ടൊവിനോ തോമസ് – ബേസിൽ ജോസഫ് കൂട്ടുകെട്ട് വീണ്ടും ഒന്നിക്കുന്ന ചിത്രമായ ‘മിന്നൽ മുരളി’ യുടെ ഒഫീഷ്യൽ പോസ്റ്ററും മോഷൻ പോസ്റ്ററും പുറത്തിറങ്ങി. മലയാളത്തിന്‍റെ സ്വന്തം സൂപ്പര്‍ സ്റ്റാര്‍ മോഹൻലാലാണ് പോസ്റ്റര്‍ സോഷ്യൽമീഡിയയിലൂടെ പുറത്തിറക്കിയിരിക്കുന്നത്. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് സിനിമ ഒരുങ്ങുന്നത്.
‘മ’ ചിഹ്നത്തിലുള്ള വസ്ത്രമണിഞ്ഞ് മാസ്കും ധരിച്ചാണ് പോസ്റ്ററിൽ ടൊവിനോയുള്ളത്. അവഞ്ചേഴ്സ് സൂപ്പര്‍ ഹീറോകളെ ഓര്‍മ്മിപ്പിക്കുന്നതാണ് പോസ്റ്റര്‍.ബാംഗ്ലൂർ ഡേയ്സ്, മുന്തിരിവള്ളികൾ തളിർക്കുമ്പോൾ, പടയോട്ടം എന്നീ സിനിമകള്‍ക്ക് ശേഷം വീക്കെൻഡ് ബ്ലോക്ക്ബസ്റ്റേഴ്സിന്‍റെ ബാനറിൽ സോഫിയ പോൾ നിർമ്മിക്കുന്നതാണ് സിനിമ. ജിഗർത്തണ്ട, ജോക്കർ തുടങ്ങിയ ചിത്രങ്ങളിലൂടെ ശ്രദ്ധേയനായ തമിഴ് താരം ഗുരു സോമസുന്ദരവും സിനിമയിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് തുടങ്ങി നിരവധി താരങ്ങള്‍ സിനിമയിലുണ്ട്.
‘മിന്നൽ മുരളി’യുടെ ഛായാഗ്രഹണം സമീർ താഹിറും സംഗീതം ഷാൻ റഹ്മാനുമാണ് നിര്‍വ്വഹിക്കുന്നത്. ചിത്രത്തിലെ പ്രധാന സംഘട്ടനരംഗങ്ങള്‍ സംവിധാനം ചെയ്യുന്നത് ബാറ്റ്മാൻ, ബാഹുബലി, സുൽത്താൻ തുടങ്ങിയ ചിത്രങ്ങൾക്ക് പിന്നിൽ പ്രവർത്തിച്ച വ്ലാഡ് റിംബർഗാണ്. മനു ജഗത് കലയും അരുൺ അനിരുദ്ധൻ, ജസ്റ്റിൻ മാത്യു എന്നിവർ രചനയും നിർവഹിച്ചിരിക്കുന്നു. വി എഫ് എക്സിന് ഏറെ പ്രാധാന്യമുള്ള സിനിമയുടെ വി എഫ് എക്‌സ് സൂപ്പർവൈസ് ചെയ്യുന്നത് ശ്രദ്ധേയനായ ആൻഡ്രൂ ഡിക്രൂസാണ്.
